Verse Drei Musketiere

Ja, üsi Poscht isch superschnäll - geng presänt und überall
Di si ja fasch so schnäll wi ds Liecht - emu de schneller als der Schall
D Wienachtsgrüess, di chöme de afang emau im März!
D’Todesazeig isch z’spät - dä isch scho lengschtens himmelwärts
Hochzyte, Konfe, si jetz neu im Winter!
D’Schtür-Rate-Rächnig isch vo weis dr Schinte!
Wenn chöme d’Schoggihase - säg emau, was gloubschte?
Richtig! Di si pünktlech ufe erschte Ougschte
Im Jäner chöme de afang di Summerferie-Charte
We D’BZ wosch vo geschter, muesch no drei Tag warte!
Und fragsch Du ume Grund am Schalter vo dene tolle Poschte
Da derfür sig tschuld - so seit me Dir: di schtigende Lagerchoschte !

Üsi Poscht und d’Schi-Nati wei jetz fusioniere
Zum „synergetisch„ vo ne nang z’profitiere!
Mit de Päckli, dert schiint me scho vil gmeinsam z’ha,
ke Fade – soutüür – u chöme nie aa.

Wo „SION-O6„ im Sand isch verloffe,
hei d Wallisser sich im Eländ besoffe!
Hüt mieche das aui - die ganz Schwiz wär „plämmplämm„
- u zwar us Fröid, we die cheibe EXPO nid chäm!

Ir Cheuti, vor der Botschaft da, ä Tschugger wo tuet tattere.
Är het - für dass es wermer wird - sis MP chli la rattere.
Dass Schiesswuet da vo Nutze isch - ja daran glaub ich kaum,
Drum zuunet doch die Botschaft ii, am beschte mit ...
… - M A S C H E N – D R O H T – Z Ä U N!

Läserbriefli verfasse, das tuet zu ihm passe,
Wi chame däm Schriber das Schribe ustribe?
S’git nume ei Pfad und nume ei Pforte,
em Fuchs - so wi däm Luchs - ä Tätsch ufe Pfote!

Der Flamingo isch gange und d’Damhirsche ou,
u d’Biber si gschwumme Richtig Felsenou!
Si hätte zwar nid dörfe, me het se du wider gfange
U der Fuchs wo hätt söue, isch leider nid gange!

D’Lawine si abe, ds Hochwasser isch gschtige,
der Hagu und der Lothar hei gwüetet.
D’Fendt isch zwar gange, aber d’Koch isch no blibe
oh Schwiz, wi hesch du wider blüetet!
Hingäge - no schlimmer da wärs zum läbe, uf dere ghögrige Ärde
We d’Diräktorin vo der Schuel no einisch gwählt sött wärde!

We Dini Beiz nid loufe tuet,
de gib nid uf, fass neue Muet!
Muesch nid uf d’Bank ga Gäld verlange,
muesch nid uf bessri Zyte plange!
We statt em Wy der Umsatz im Chäller isch,
de gang Du doch ga Lumpe lege, Lumpe lege...
chunnsch jetz ändlech drus?
Lumpe lege, Lumpe lege, so wi im Bür-ger-hus!

Schnälldurchlouf :

Wenn eine tannigi Hose hett und hagebuechig Schtrümpf,
de chaner tanze wie är wott, äs git ihm kener Rümpf.

Bisch ä Büetzer ohni Job, ohni Erfoug u ohni Chöle,
de la Dini Haar la wachse, suech ä Band u nenn Di „Gölä„

U der Moritz het der Schnoutz abghoue, mitem scharfe Mässer,
Öb mit oder nöi ohni – inne drinne wird’s nid besser!

Wasser isch zwar wichtig, aber s’tuet nid immer gfalle
Aber lieber nomau ds Hochwasser, derfür ke Wasserfallen!

Wär immer informiert wott si, seriös und mit aller Gwähr,
dä list am allerbeschtischte üse dämlech „Bärner-Bär.„

Si isch gruusig, chli und fett u schlicht umene Chindergarte,
sisch d’Nella Martinetti, wo uf d Pouse chum mah gwarte.

Si isch no gruusiger als d’Nella, dass es d’Zäihenegu böglet
Sisch d’Dolder, wo der Villiger wider einisch... brunnetröglet.

U d’Stüüre muesch nümm zahle,
Du darfsch d’Frösch jetz ga verschpotte,
organisierti Bättlerei isch nähmlech
neuerdings verbote!

U wär jetz da kei Wy me hett, nur äs läärs Glas näbem Täller,
dä machts halt wie dr YB - , und geit no schnäll i Chäller.

Schprüch hei mir jetz keini me, mir hei nüt me i dr Hang
Ds Einzige wo mir no wei, isch Wein, Weib und Gesang !

E-Mail an das Harpodium