Verse Pfannehouer

Mönu 2000

Mir fählt dr Schtutz für mini Sippe
Für d Chrankekasse, d’Chinderchrippe
Zum Glück muess ig uf ds Gäld nid warte:
I ha zwe Lothar-Böim im Garte.

S wird verdouigsmässig viil verbroche
Drumm tuen ou ig itz Schon-Choscht choche
So chasch ou ds Portemonnaie chlei schone:
Wüll wenn’s mit Kohl isch, choscht’s Millione.

Mi fragt sech sorgevoll – frivol:
Wi mänge Furz chunnt no vom Kohl?

I bi i d Wüeschti ufne Trip
S’isch e Schissdräck gsi und gar nid hip!
I ha mi ufgregt wi ne More
Wüll i mis Handy ha verlore.

I ha ne jahrelange Kampf
Mit Orange – es isch meh e Chrampf
Es heisst doch: „Je länger wir sprechen,
desto günstiger wird es“, und ig schnure und schnure,
bis dr Zähler äntlech uf gratis gumpet,
Und när schnure n’i witter, bis Orange verlumpet!

Wi dr Oskar Lafontaine am Schluss
Wirbt d SP Schwiz für Bifidus
Das scharft ds Profil vom Gmeinschafts-Wercher:
Links-träjend, suur, mit Gschmacks-Verschtercher

Als Beiz chunnt d SP nümm i d Chränz
Dert choche n’all in Konkurränz

Eis Puff herrscht ufem Schtrasseschtrich
Alls trückt und schtosst, s’isch fürchterlich!
All gäbe Gas und si pressiert,
Wüll am Mäntig wird dr Verchehr halbiert

***

Mir göh über zur Wild-Charte:
Letscht Jahr hei lutt Schtatistik da
200 Wildsöi uf de Schtrasse ihres Läbe glah
Aber d Gsamtzahl törft no höcher sii:
Wüll die am Schtüür si nid drbii.

Im Wald herrscht Borkechäfer-Frass
Im Fürschtetum, da nagt der Haas
Im Oberland, da riisst dr Luchs
U z Bärn, da gorpse Bär und Fuchs

Das wär d Wild-charte gsi-
Momänt, Tisch 17 hett no supplément:
Wenn ig uf gwüssi Chöch wett boue
Müesst i ou no ne Frösch i d Pfanne houe
Aber das ganz beschtimmte Gschmäckli tranne
Chäm nid vom Frösch, s’chäm vo de Pfanne......

***

Lutt däm Pricht hett Bärn scho Läbesqualität
I däm Sinn chäm der Tschäppät z schpät
Gliich guet klassiert si Wien und Bärn
Säget: Ghöret Dihr das gärn?

Pizzeria, Take-away, Bar, Tea-Room
Bärn erläbt e Beize-Boom
Für dass das Gschäft o für d Schtadt würd loufe
Müesst me dr Gmeindrat „Cafe Alex » toufe

Dr Frouetag hett e guete Klang
Z Bärn schtigt e gwichtige Empfang
Während dr Deiss im Lohn mit dr Ferrero liiret,
Hett d Loren ihre Lohn in Lire gfiiret.

O SVP-Volksmelodie
Mal jupp-hei-da, mal jupp-hei-di
O wie mit nüt vergliichbar schteisch du da:
Jupp-Hei-di, Hai-der, trallalla

Mal AHV, mal AH-läär
zringsetum, das isch nid schwär
Heidi, Di wei nid beidi
Hei, Di hett dr Haider gärn

Di nächschti Papschtwahl gitt ke Hit,
Gwählt wird Johannes Paul dr Dritt
Gliich schtuune si vo Rom bis Schpeyer:
19 Stimme hett dr Frank A. Meyer

Wär ig es Kunscht-Besamigs-Ching, de hätt i
Gärn Uskunft: Wele (Sami) isch mis Vätti?
Hingäge ohne anonyme Schpändi
Wär zum Bischpil YB lengscht am Ändi!

Dr Spitze-Schportler Bärner Bär
Gitt ohni Schponsor-Schpänder-Schprutz nüüt här
Ou d CDU tribt Schpitze-Schport
Dert hei d Schpänder sogar ds Ehrewort

Itz wird saniert und optimiert:
YB, SCB, BSV wärde fusioniert!
Ds Produkt, das längt uf jede Fall
Für Dritti Liga Wasserball.

***

Läärgfägt und toteschtill isch d Schtadt
Nume n’am Portal vom Heiliggeischt chläbt es einsams Blatt:
„Ich warne Euch, so geht es allen!
Gezeichnet: Lothar Wasserfallen“

Ds Bundesgricht gitt däm jüdische Flüchtling nid rächt
Drfür 100'000 Schtei Entschädigung - ja was isch d drann schlächt?
Wenn eim ds Härz i d Hose gheit, ja de
Gheits wenigschtens uf ds Portemonnaie.

Wenn ds Bundesgricht i ds Schlöidere chunnt
Richtet d Schwiz dr Hosebund

Mi Gieu, dä hett, das isch de chic,
E Sächser ir nöie Rächtschribic:
„Auf der Strasse standen Gämsen,
Doch der Papa konnte nümmen brämsen!“

Nach däm Jahr voll Überschwemmige
Hätt i zimlech Hemmige
Wenn mi Chef, wo alles schmeisst,
Usgrächnet Wasser fallen heisst.

Wenn i der Matte d Schwelle schwelle
Hett ou e Wasser-Pumpi nümmeh z bschtelle
Oder müesst me’s eifach schnalle:
D Matte n’isch e Wasserfalle?
Dihr chömet nid druus, dihr Hydrologe:
S chuntt alls vom Bättle und de Droge!

Et comme dessert hie no l’invitation
Für ds zuekünftige mönü social national :
Schtatt Holder-Saft Shareholder-Saft
Schtatt Bio Roche-Novartis-Chraft
Schtatt Ratione Rationierige
Schtatt infusions Fusionierige
Schtatt Schmalz uf ds Brot dr Gwinn umlänke
Schtatt Söifüess choche Schtüürfüess sänke
Schtatt Schafs-Vorässe Luchsepfötli
Schtatt AHV Almose-Nötli
Schtatt Röschti Divid-Änte-Brüschtli
Schtatt Arteplage es Bratwurscht-Chüschtli
Und schtatt „repondez s’il vous plaît“
Antwort: Postfach, SVP