Verse

Verse Die Schwarze

Olympia adé, adé,
Das tuet nid nur am Ogi weh!
O üsi Not isch risegross:
So wärde mir dä niemeh los.

D’Young Boys uf em Wankdorffäld
Schutte schlächt u hei ke Gäld.
Derbi bruchsch Koks, u gar ke Chohle,
De chönntsch der Maradona hole.

Finanzpolitisch würds räntiere,
We d’Schwyz u Dütschland fusioniere:
D’Finanzverwaltig, als Troumpaar quasi,
Übernähmte der Kohl un der Belasi.

Tuesch gärn spile, chosle, chnüble,
liire u ir Seele grüble?
Bisch gnue blöd, spilsch gärn der Clown
De mäld di doch bim Robinson.

Dr Bundesrat het raffiniert
Am Haider z’Östrich offeriert:
Mir würde der Hermann Maier näh
Und ihm derfür der Blocher gäh.

S’Chrischkind macht der Drogestrich,
Will der Samichlous ä Fixer isch.
U für dä zvertribe, s’isch banau,
Machsch d’Wiehnachtbelüchtig eifach blau.

Altersheim si mega in,
Chum isch der Mäni Wäber din.
Wär aus nächschts drum o dri wetti,
Isch dänk d’Nella Martinetti.

Dr Steinegger seit: Mir starte neu,
D’Expo 01 wird d’Expo 02.
U vorusgsetzt s’louft itz alles glatt,
Findt si no i däm Jahrtuusig statt.

Schwein gha het der Thomas Fuchs,
Denn stell dir vor dä hiessi Luchs,
Är würd usgschaffe via Klote,
Zrügg blibte nume siner Pfote.

D’SP geit statt i d’Klousur
Mit der Ursula Koch uf ne Velotour,
Das het die gstresst, me chas verstah:
Ihres Velo het ä Rücktritt gha.

Dr Stefan Raab, dä cooli Ma,
Singt wadde hadde dudde da.
Z’Bärn kennt me settig Texte o.
Dr Boumgartner redt scho lang eso.

Un zum Schluss a Evergreen, wo mir scho
Färn gsunge hei u sicher o nächschts Jahr
wieder singe:

Äs Schwizerli schteit uf de Schi,
Isch im erschte Tor no knapp derbi,
Bir Zwüschezyt wit hingedri
U im Ziel isch de scho Früehlig gsi.