Verse Wöschwyber

Bärn wirsch clean, mir fahre-n-i, mit Wöschibrätt u Seife.
Mir rible, chlopfe, wäsche d Wösch, niemer cha meh kneife.
O öich tüe mir jitz d Chuttle putze, ds Hirni dürewäsche.
Zum Schpüele, Wirt, la di nit lumpe, bring e gueti Fläsche.

Wär wird Schtapi i däm Jahr, wär ächtsch, wäreli wär?
Tschäppät, Wasserfalle oder doch dr blondi Bär?
Mir wäre für e François Loeb, dä het no Visione.
Dä chönnti de ganz bürgernach im Loebschaufänschter wohne.

„Hesch mer e Stutz, e chlyni Gab, 2 Franke oder so.
I bruchs zum Überläbe, weisch. 50 Rappe länge-n- o“.
D Bättler jagt me-n- us dr Stadt, wiu morn gsehsch derte hocke,
dr Gmeindrat, wo in corpore d Passante tuet abzocke.

Mir hei gärn es subers Land, voll Fröd, dass Ogi lacht.
Gottlob hei mir e Robidog für das, wo ds Hundli macht.
Do schtecke mer o dr Blocher dri, nei, würklich, ohni Kohl.
Dä füehlt sich i dr bruune Schissi doch so pudelwohl.

YB Pflume, dr BSV stier u dr SCB nümm top.
D Stadt voll Bättler, Dräck u Gschmier. Bärn isch gli bankrott.
Bi YB gits e Hoffnigsschimmer, si finge ne riche Götti,
U als Coach vo de young boys bewirbt sich wermschtens d Nella Martinetti.

Ir Wiehnachtszyt, schpät i dr Nacht, da chunnt mi Aute hei.
Schletzt d Türe, schwänkt e Buessezettu, macht e suure Schtei.
Är het parkiert ir Münschtergass, isch de ab i d Krone.
Isch das e Löu, jitz het dä gmeint, es sig dert blaui Zone.

Si gwünne gäge Niederwange u schlö o Thörishus.
S geit obsi, muesch jitz nümme bange, d Fans si zum Hüsli us.
We das so wytergeit, s wär toll, de schpile die nundefane,
Um en Ufschtig, dir, i d Liga vo de Blinde u de Lahme.

Fusi fusi fusioniere, isch d Losig vo de Grosse.
Glo glo glo globalisiere, die ganzi Wäut ei Sosse.
D Bosse pilgere uf Davos, dr Ogi trifft dr Clinton:
Hello Bill, I’m Ogi and Ig o is the same von hinten“.

D SVP schtürmt vo Sieg zu Sieg, marschiert dür au Inschtanze.
Rumt gierig uf vo rächts bis links, verschlingt u füllt dr Ranze.
D SD u dr Scherrerclub, es wird üs angscht u bang:
Bi so me ne grosse Appetit, zletscht frässe die enang.

Du Huerenarsch, verarsch mi nid, i finge das nid cool.
Du kacksch mi a, du Matschobire, du Gigu bisch ja schwul.“
Du Dräcklatz, fuck you, dine Gring isch en Abschtrich vo dim Arsch.“
Vorwärts, träm träm träderidri, dasch dr nöii Bärner Marsch.
 
Dr Fuchs, dä het e grossi Schnure u nimmt se ganz schön voll.
Ir Zytig autet är sich gärn, mer finges geil u toll.
Wenn är si Schnure wyt ufrisst, de dänk i, wie das wär:
E so ne blutte, mediegeile, brune Ghüderbär.

S isch so nätt im Internet, mir tschätte virtuell.
Mir maile, geime, lade-n-abe, peitsche houm as well.
Mir sörfe dür die ganzi Wäut, tschegge jede Link, oh let it!
Dr Kompi mäudet: „Error, sorry, d SP Schwyz, forget it.“

Bir Abfahrt z Garmisch – so ne Flop – wo si üser Lüt?
Mir sueche se mit em Teleskop – wyt u breit isch nüt.
Si sige gschtartet, seit me-n-üs, die Schtrecki isch haut läng.
U we si noni gschtorbe si, de fahre si dert no gäng.

Bärn wirsch clean, mir fahre-n-i, mit Wöschibrätt u Seife.
Mir rible, chlopfe, wäsche d Wösch, niemer cha meh kneife.
U wär sich sperrt, nid wäsche lat, entsorge unscheniert:
Dr Chlöisu, wo scho fulet, wird als Bätzi destilliert
D Frösch bio-dynamisch u organisch komposchtiert
Dr Giftsack Wasserfalle wird als Sondermüll abgfüehrt
Dr Neukomm, mir si froh, het sich als Fläsche ussortiert
D Omar links rächts glismet wird ids Brockehus schpediert
Dr Guggisbärg, ganz hohl u läär, als Osterei poschtiert
D Begert, süess u bitter, wird mit Hut u Haar scheliert.
U we d Stadt ändlech suber isch, de blybt no ds Bundeshus:
Usmischte, denn für d EXPO gits e Würschtlibude drus.

E-Mail an das Harpodium