Verse Zibelegringe

E-Mail an das Harpodium

Z`Vreni frürt im Winter geng a d` Ohre,
das macht se hässig wi-ne Mohre.
Ig ha ne gueti Lösig, meint der Andy:
Telefonier`doch geng mit zwöine Handy.

I`r Vollmondnacht, allei und g‘heim,
kreist öppis Runds um z’Buebeheim.
Mir kenne z’G’heimnis, und wär’s wüsse wetti:
kes UFO isch s, nei, s’isch d’Nella Martinetti!

Wo der Ebner isch i Himmel cho,
hett ihm der Tüfel d‘Tür ufto.
Was isch da los, was isch passiert?
Der Tüfel meint: Ou mir hei fusioniert!

Steinegger‘s Franz isch würklech froh,
dass der Lothar Sturm isch cho.
E Riese-Arteplage sygi jetz` sys Ziel,
us Tanneholz, vo Yverdon bis Biel!

Ha ke Münz zum parke vor em Parlament,
bi drum schnäll uf d`Nationalbank g’rennt.
Gratis git`s dört Stütz wie Heu, so quasi,
hei s`ech tüüscht, hei g`meint ig heiss` Bellasi!

Der Leuebärger hett sy Schnouz rasiert,
hett das ächt sy Fründin inszeniert?
Nei, mir hei’s ergründet und vernoh,
so git`s meh Platz - für Bärt y-z’foh!

Es Himmugüegeli, es rots, das gseht    
es gälb`s, wo fasch kei Pünktli hett.
Ja säg, was bisch de du für eine?
Weisch, ig bi im Wankdorf z‘Bärn daheime.

Der Guggisbärg, dä vor fromme CVP,
wott so Freude-Salons nümme gseh.
Im Quartier, wo alli nur tüe wohne,
plant är ä sogenannti Puff(er)zone.

Der Chlous hett g‘seit, är chömm‘ no mal
im Dame-Sandwich zu-re G’meindrats-Wahl.
Doch mi sött` bi all däm nit vergässe,
s`Ganze wird am Schluss vom Alex gfrässe.

Ha i`r Münschtergass i d`Loube welle schiffe,
hett mi doch ä Tschugger grad ergriffe.
Entschuldigung, i hätti welle wette,
bi däm Blauliecht syg` das ä Toilette.

D‘Stadtverwaltig sygi z’gross u müessi künftig
abg’späckt wärde, und zwar zünftig.
Der G’meindrat gar nit dumm, verordnet Xenical.
Der Stapi isch no schlauer, nimmt grad zwöi uf z’mal!

D`Freud isch fuurt bim Personal vor SVB.
Beamte-Status wäg, u kei Kantine meh.
Au der Bricht, dä bösi, isch verschwunde.
Was no blybt: der Kamber,... u die dumme Chunde!

I`r Liegeschaftsverwaltig z`Bärn
herrscht es Chaos, das hei d`Mieter gärn.
Derfür wott` me mit de Stüüre ufe goh;
das isch Management by Frösch und Co.

Couchepin z`Indie, Ogi z`Kosovo,
Dreifuss, Deiss und Metzler äbeso,
Leuebärger z`Ängland, Villiger z`Amerika,
für was muess d`Schwiiz no ä  Regierig ha?

Es grosses G`schyss um das Millenium,
viil Uufwand, Gäld und nüt steit um.
Nur ir Stadt bliibt üs der glychlig Chummer,
z`neue Budget chunnt gäng erscht` im Summer.

D`r Bärner Gmeindrat wott meh Chole
bi de Ussegmeinde yne-hole.
Das syg` nid logisch, tüe sich die beschwärde,
i`r Stadt dörf doch jetz nümm bättlet wärde?!

Söll me üse Goldschatz knacke?
Wär söll wieviel Stütz y-sacke?
Das G`schtürm chönnt schnäll es Ändi ha,
Gib`s den Anwält uf Amerika!

D`Frau Koch heig schynt`s ä neue Stell.
Sie göng, will se d`SP nümme well.
Si wott` als Chöchi i`z Wallis ga;
u dört der Bodema i`d`Pfanne schla.

Wo der Braun het g`seh, was Rey no geng kassiert,
hett är als Post-Chef o grad demissioniert.
Wie b`ir Briefposcht wird me künftig g`woge.
D`Ränte wird drum au per Gramm bezoge.

D`r Ogi seit, ig muess der Schüssel g`seh.
Mit üsem Schi-Team geit`s gar nümm` meh.
Meint dä, muesch doch nid lang frage,
die sölle einfach wieder z`Chäs-Dress trage.

Im Tierpark sy ne d`Biber use.
Mir hei erfahre, wo die Tier hüt huuse.
Für d`Alpar baue sie jetz` stramm,
i`r Belpau flicke sie der Aare-Damm.

E-Mail an das Harpodium