Schnitzelbank vo de Chropfchrötte
vo Bade im Aargou

E Bäremändu seit im Grabe:
„Da luegt immer eine abe-
Wie mir däm arme Siech ned es Zimmer gäh?“
U ds Bäremuetti seit: „Nei - hous,
U reich e Wärter, - dasch der Chlous!
Dä wott is sicher üsi Chällerwonig näh!“

Ich ha Chopfweh gha und Pfnüsel -
Und ha ghueschtet wienen Grüsel -
Bi zum Tokter und dä hed sich d Flosse gribe:
Do bruuchts Antibiotika -
Ich ha grad so Züg vo Oeschtriich da! -
Ich hätti ihne gern es Schwiinsgottlett verschribe!

Vom Tante Rosi hets e Charte -
Und en Proschpäkt für euse Garte -
Und e Zahnarzträchnig vo feufhundert Schtei -
Das list mir alls de Pöschtler vor, -
Dä chunnt nur bis zum Gartetor -
Sit mir en Kampf-Kanarievogel händ dihei...

Ischs en Wolf ,- oder öppe en Luchs –
Ischs en Hund - oder gar en Fuchs?
Für en Walliser Jäger ganz e schwirigi Sach!
Für de Tschaggoboo kei Häxerei -
Und er funkt de Polizei -
Sisch e Wildsou, und die liit jetz flach!

Ich hock diheime vor de Glotze, -
Do foht euse Bäri afo chotze. –
Bim SF DRS löschts dem eifach immer ab.
Ich zapp uf BIG BRÖSER übere, churz, -
Do schreit mini Alt im Chuchischurz:
Wenn gvöglet wird, schtell der d Chischte ab!

Es tönt en Geuss durs Bundeshuus -
Ich verreck, ich chumm nümm druus!
Ich zell - und zell - wievill Millione hämmer?
Do seit zum Villiger en Maa:
Hesch dini Ovo hütt scho gha?
Mit dere chasch ned besser zelle - defür länger...

Wenns dir trüllet i de Bire, -
Und grüeni Pünkt tüend umeschwirre, -
Und dis Näscht mit hundertzwänzg dur s Zimmer kracht, -
Denn hesch entwäder en Siech, -
oder, - was hütt nümm jede miech, -
Es saftigs Rindsfilee gfrässe gha zum Znacht...-