Wöschwyber

Fasnacht 2001

Bärn wird suber, mir fahre-n-i, mit Wöschibrätt u Seife.
Mir rible, chlopfe, wäsche d Wösch, niemer cha meh kneife.
Ou du da hesch kei wyssi Weschte, villicht geisch scho gly hops
Dis Haar isch lengscht analysiert uf Vaterschaft u Koks.

Cumulus u Supercard u doppleti Pünkt am Frytig,
For Käsch gits Visa, Mastercard, for frii im Tram e Zytig.
i-bänking, i-schop u i-mail, bisch öptudeit, s geit ring.
Ganz plump macht ire Bäsechammere dr Bumbum schnäu es Ching.

Die bittersüessi Olibet, dr Tschäppät blau statt rot,
Dr Ädu, wo ke Ahnig het, dr Haas wo Höögge schlot.
Oder öppe Wasserfalle Kurt – was – Stapi wärde wott er?
Ou nid d Frou Bümpliz-Unbekannt, i wähl dr Harry Potter

Mir flüschtere mit verklärtem Blick, di Name, gö uf d Chnöi.
Alleluja, Hosianna, singe mir geng nöi.
Mir bitte um di heilig Säge, du zeigsch üs dr Wäg.
Die ganzi Wäut, die piugeret - zum Döuf uf Kanderstäg

Sie knalle päng päng d’Omar ab u schmeisse d Frösch ad Wand.
D’SP blast zum Halali, isch usser Rand u Band.
Sie raffe gierig aus a sich u wei geng no meh.
Die spinne, s isch dr Wahn – e klare Fau vo BSE.

Big Brother isch e geili Sach, mir geifere nach der Schou.
Si sabbere, blabbere, oute sich, mir wähle, wär muess gou.
Sex i dr Duschi, uf dr Schiissi, oral, anal, banal:
Uf die Art gwünnt villicht dr Fuchs die nächschti Gmeindratswahl.

Presidäntewahl z Amerika, viu Schou, Glamour u Gäld.
S geit hert uf hert, me weiss nie rächt, wär isch de schliesslich gwählt.
Die ganzi Wäut luegt zue u grinst, das machts no viu brutaler.
Loch, nid Loch, für üs isch klar - mit Loch ischs Ämmitaler.

Fusioniere isch im Trend, d Schwyz wird geng globaler.
Davos ei Feschtig u drfür breichts Züri no brutaler.
Fremdi Fötzu bsetze ds Land, jitz bruuchts di, Willy Tell!
I ds Prättigau chunnsch grad no z Fuess, uf Davos nur virtuell.

Rot isch d Liebi, rot isch ds Bluet, si d Lippe vo mim Schatz.
Rot isch ds Tram, rot isch d Regierig u dr Casinoplatz.
Rot isch d Fürwehr, ds Häxebrot u d Wuet nach ere YB-Schlappe.
Schwarz gseh mir bim Guggisbärg, dä isch ja nur Attrappe.

Vor dr HG bättlet e kurlige Typ, stier ume nes paar Fränkli.
Er het zum Wohne zweni Gäld, drum schlaft er ufeme Bänkli.
Umen Egge stürmt dr Wasserfalle: „E Bättler, wo chunnt dä här?
Für di hets Platz im Bäregrabe, du sture blonde Bär.“

D Schwyz gliicht imene Hüehnerhof, aus gaggeret dürenang.
Eis Gschär, eis Züg, es Huehn isch gschlüpft, sie gratuliere nang.
drufabe scho eis Gchär u Gstürm um ds Outfit, ds Gäld, eis Gheu .
Das Huehn wird wyter grupft u gschtutzt - adiö EXPO 02.