Der Tell isch vor em Gessler-Huet
ganz schnäll verby, het gar nit gluegt.
z Bärn isch z Volk a d Urne ggange
jetz hei mir eso ne Tschäppu uf der Stange!

Der Bärner Bär im Wappe seit:
Si wei mi nümm, u geit.
Der Stapi wott sys eigne Wappe ha:
Es feisses B, mit drüüne Härli obedra...

Der Ogi Dölf, dä wott nid roschte
Är suecht e internationale Poschte;
drum üebt är u hofft, es würd ihm glinge,
„Freude herrscht“ i 70 Sprache z bringe.

Em Borer syne sexy Frou z Berlin
sorgt im EDA z Bärn für heissi Gring.
Der Thomas seit: Du muesch alwäg jetze,
ou em Joseph Deiss uf d Chnöi ga sitze!

Der Thorbärg-Chuchichef isch toube wi ne More,
är hett bim Guide Michelin e Stärn verlore.
Ou syni Balkan-Gescht hei heftig reklamiert,
är hett ne z Birchermüesli z warm serviert...

Ämmitaler Chäs gitz jetz i neuer Form,
mit Löcher, ganz genau nach US-Norm.
Dä Chäs chasch ou als Loch-Charte ha,
für die nächste Wahle z Florida.

Rot isch d Modefarb i üser Stadt,
bi Tram u Bus, bi Plätz, im Rat.
Nume Therese Frösch isch sit de Wahle,
nümm so rot wie ihri Budgetzahle.

Der alt Burgerpresidänt louft Sturm,
wäg däm Mäc bim Zytglogge-Turm.
Mir hei vernoh, der Ruedi von, dä heigis satt,
wöll keni frömde Burger i der Innestadt!

Sorge macht üs jetz dä Wasserfalle,
tuet nur no vo Europa lalle.
Är gloubt, ir EU wär me besser ghalte,
u chönnti d Nationalrats-Gälder bhalte...

D Expo-Arteplage wöll me richtig toufe,
Steinegger muess nid äxtra Schämpis choufe.
Är hett es Angebot vom Ernst August ergriffe:
dä Pipi-Prinz chöm gärn, u wöll dra-schiffe.

D Schwyzer Slalomfahrer blybe bhange,
gheie um u fahre näb de Stange –
i ha derwyle mängisch, ohni uf em Füdle z lande,
am Bahnhofplatz dä Slalom fählerfrei bestande!

d Mir, die alti Russe-Ruumstation,
stürzt nächtens ab, u gheit i Ozean -
s chönn o sy, dass si z Australie abe ghei,
drum chunnt der Gölä hantli wieder hei...  

Bi mit mym Kickboard gruusig überfloge,
u mir derby e bbrochne Arm zue zoge -
Wär das mit däm SMS chly schnäller ggange,
de wär i nid im Sänkloch blybe bhange...

Ei Güggel hett zum andere Güggel gseit:
I wüsst e hennegeili Glägeheit;
zum Christoph Blocher muess me ga,
dert chasch grupfti Hüehner ha.

Ob Schmid, ob Villiger, ob Deiss,
ou d’Ruthlis u der Leuebärger weiss:
Bi jedem Geschäft, ob gross ob chly,
der Couchepin steckt sy Nase dry.

Neujahrsempfang ganz ohni Cut?
Ja, wülls der Leuebärger gärn so wett!
D Metzler möcht dä Empfang am 1.Ougste ha:
i Shorts, Bikini oder grad im Tanga...

Mues mit mym Pudeli zum Psychiater gah,
es faht so Kampfhund-Mödeli a.
Bi schön erchlüpft, wüll dir müesst wüsse,
es hett der Tochter ihres Bäbi bbisse.

D Boulevardpress isch voll vo Boris Becker,
das Theater geit eim langsam uf e Wecker,
will dä mit offnem Hoselade umelouft,
wird är jetz Beris Bocker touft...

Zwe Schnägge jufle gäge ne Garte,
früsche Salat, da darfsch nid warte!
Churz vor em Zyl, da tuets blitze,
es Radar, Tämpo 30 gilt äbe jetze!

Der Stapi seit: Dä Mietzins isch e Gruus,
da hilf i nümm, i Chlous zieh us.
Är lüttet drum der Wannemacher a,
möchti als Big Brother i Container gah...